週六上晝有多場NBA常規賽陸續開打，當中最吸引眼球嘅絕對係獨行俠主場迎戰湖人。紫金軍團今季幾咁威猛大家有目共睹，近期一波六連勝後勝率再次提升到八成以上，西岸頭把交椅估計有排都唔會易主。反觀獨行俠最近略顯飄忽，加上過去幾次面對湖人輸多贏少，即使人手方面可能相對齊整，兼且坐擁主場優勢，各位觀眾今鋪亦不宜期待太多。咁精彩嘅強強對話點可以錯過M直播屆時為各位波友奉獻嘅實時戰況。

　　進入NBA第二年嘅盧卡當錫持續綻放「歐洲MVP」光芒，賽季至今兩個半月已過接近半程，呢位獨行俠新任頭牌出戰33場就斬獲過11次大三元，未滿21歲嘅年齡同其過分沉穩嘅技術風格以及個人豪華成績單根本唔對等，確實能令廣大球迷不自覺地感歎「英雄出少年」。雖然球隊經常打出活力四射嘅進攻高潮，三次淨勝40分以上就係力證，無奈球隊戰績唔算太突出，23勝14負排西岸第六，點睇都係唔夠火候，尤其是頻頻被詬病比賽每當去到關鍵時刻猶如散失咗大半功力。講到呢度大家應該唔會唔記得佢哋上仗主場打金塊就係最後時刻傳接處理失當從而錯失出手機會1分之差飲恨；計埋前幾場，自從上個月尾大炒勇士之後，球隊近6場淨係贏過2個主場。爭勝力驟降難免會響起唔少呼喊波辛基斯盡快傷癒歸隊嘅聲音，畢竟呢位拉脫維亞高佬均場可以貢獻全隊第二高嘅17.3分、9.4個籃板外加2.1次封阻，冇佢鎮守嘅三秒區甚至淪為對手自出自入地帶，盧卡當錫再多大三元都係入不敷出。更不利嘅係，盧卡當錫自從加入NBA以嚟總共同湖人交手過6次、輸足5次，期間居然冇任何一次命中率達到五成，包括上個月頭作客贏嘅唯一一次，今次究竟有冇辦法克服苦主，我哋不妨拭目以待。

　　聖誕大戰告負、經歷完今季最長嘅四連敗之後，湖人喺2019年底成功反彈，上仗主場輕取紐約人迎嚟一波六連勝，成為聯盟第二支突破30勝嘅球隊，實力同狀態都好過獨行俠相信無需置疑。貴為全聯盟最硬淨嘅盾墻，連續2場失分唔破百嘅紫金軍團目前防守效率係全聯盟第三好、僅次於公鹿同速龍，與此同時進攻效率亦都高居第四，真可謂攻守兼備；反觀獨行俠儘管進攻銳利度暫時領跑全聯盟，不過防守水準僅屬30隊當中嘅中游，由此可見雙方今季頭三次交鋒湖人理所當然贏兩次稍佔上風。不過湖人今仗贏面並非十拿九穩，皆因安東尼戴維斯喺最近打紐約人嘅時候某次對抗中失衡跌傷尾骨離場，好彩檢查結果顯示無結構性損傷，不過可以肯定嘅係此番唔會披甲出戰；另外仲有外圍鐵閘A.巴特利因身體不適出戰成疑。咁球迷最關心嘅勒邦占士咧？根據相關報導，「皇帝」身上出現流感癥狀，不過貴為頭號球星兼且一向好勝心切，外界預測佢今鋪好大可能帶病上陣。或者發揮會有影響，但勒邦占士今季已完全轉型成為聯盟助攻王，身邊有一班射得、搶得嘅隊友，相信佢只要保持平時嘅傳波水準，如無意外湖人將會贏得雙方近9次常規賽交鋒嘅第八次。